ដោយៈលក្ខិណា

ភ្នំពេញៈ ទៅតាមគម្រោងដែលបានគ្រោងទុក នៅថ្ងៃទី១ កញ្ញា២០២១នេះ កម្ពុជាបានប្រកាសដាក់ឱ្យដំណើរការជាផ្លូវការ នូវថ្នាលចុះបញ្ជីអាជីវកម្មប្រព័ន្ធបច្ចេកវិទ្យាព័ត៌​មានវិទ្យាដំណាក់កាលទី២ ដោយមានលោកអគ្គបណ្ឌិតសភាចារ្យអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុជាអធិបតីផងដែរ។

លោកផាន់ ផល្លា អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ថា បើទោះបីជាមានរំខានឥតឈប់ឈរពីកូវីដ១៩ក៏ដោយ ក៏ក្រុមការងារកំណែទម្រង់ មិនបានបន្ថយល្បឿន ក្នុងការកែទម្រង់របស់រាជរដ្ឋាភិបាលឡើយ។ ផ្ទុយទៅវិញ ក្នុងបរិការណ៍ដែលមានការរឹតត្បិតការធ្វើដំណើរ ការជួបគ្នាផ្ទាល់ ក្រុមការងារបានបង្កើនល្បឿន ក្នុងការរៀបចំប្រព័ន្ធចុះបញ្ជី អាជីវកម្មតាមថ្នាលប្រព័ន្ធបច្ចេកវិទ្យាព័ត៌មាន ក្នុងគោលដៅកែសម្រួលបរិយាកាសធុរកិច្ចផង និងធានានិរន្តភាពនៃដំណើរការធុរកិច្ចផង ។

លោកបន្តថា "ដូចគ្នានឹងដំណាក់កាលទី១ ការស្នើសុំអាជ្ញាប័ណ្ណឬលិខិតអនុញ្ញាតដំណាក់កាលទី២ ត្រូវធ្វើឡើងតាមប្រព័ន្ធអនឡាញទាំងស្រុង តាមរយៈគេហទំព័រ http://www.registrationservices.gov.kh ដោយមិនចាំបាច់ធ្វើដំណើរទៅជួបមន្ត្រីផ្ទាល់ឬប្រើប្រាស់ឯកសាររូបីនោះទេ"។ លោកបន្តថា "ដើម្បីបង្កលក្ខណៈងាយស្រួលដល់ការអភិវឌ្ឍនិងការថែទាំនិងការប្រើប្រាស់ ដំណាក់កាលទី១និងដំណាក់កាលទី២នេះ ត្រូវបានផ្លាស់ប្តូរទិន្នន័យ តាមរយៈថ្នាលផ្លាស់ប្តូរទិន្នន័យកម្ពុជា ដែលមានន័យថាធុរជនពុំបាច់បញ្ចូលទិន្នន័យច្រំដែលនោះទេ ដោយគ្រាន់តែវាយបញ្ចូលលេខអត្តសញ្ញាណសហគ្រាសរួម"។

លោកបន្ថែមថា យន្តការថ្មីនៃការស្នើសុំអាជ្ញាប័ណ្ណ ឬលិខិតអនុញ្ញាតតាមថ្នាលបច្ចេកវិទ្យាព័ត៌មាន ក៏មានលក្ខណៈងាយស្រួលជាងយន្តការចាស់ផងដែរ ដោយមានការកាត់បន្ថយនីតិវិធីការចំណាយនិងពេលវេលាផងដែរ៕