ក្រុមប្រឹក្សាឃ្លាំមើលកម្ពុជា៖ សូមដោះលែងលោក អៀ ចាន់ណា ដោយគ្មានលក្ខខណ្ឌ

CWCI Cambodia

Jun 1

ដោយ CWCI Cambodia

ពីប្រទេសន័រវែស ក្រុមប្រឹក្សាឃ្លាំមើលកម្ពុជា បានចេញសេចក្តីថ្លែងការណ៍ អំពាវនាវឲ្យតុលាការ និងរដ្ឋាភិបាលកម្ពុជា ដោះលែងលោក អៀ ចាន់ណា សកម្មជនព្រំដែន និងជាសមាជិកក្រុមប្រឹក្សាឃ្លាំមើលកម្ពុជា ដែលត្រូវបានចាប់ខ្លួននៅប្រទេសកម្ពុជា ថ្ងៃទី ៣០ ខែឧសភា ឆ្នាំ២០២២ នៅពេលលោក ទៅចូលរួមយុទ្ធនាការឃោសនាបោះឆ្នោតឃុំសង្កាត់ ជាមួយគណបក្សភ្លើងទៀន។ សេចក្តីថ្លែងការណ៍នេះ ចុះហត្ថលេខាដោយលោក ម៉ែន ណាត ផ្សព្វផ្សាយនៅថ្ងៃទី០១ ខែមិថុនា នេះ។

លោក អៀ ចាន់ណា ជាអតិតអគ្គលេខាធិការរងនៃ ចលនានិស្សិតដើម្បីលទ្ធិប្រជាធិបតេយ្យ ដែលត្រូវបានភៀសខ្លួននយោបាយ ទៅរស់នៅប្រទេសន័រវែស បន្ទាប់ពីរដ្ឋាភិបាលកម្ពុជា តាមចាប់ខ្លួនលោក ក្រោយពេលបានចូលរួមចុះហត្ថលេខា លើសេចក្តីថ្លែងការណ៍រួម រួមជាមួយលោក រ៉ុង ឈុន លោក ជា មុន្នី និងលោក ម៉ែន ណាត នៃក្រុមប្រឹក្សាឃ្លាំមើលកម្ពុជា (មានឯកសារ) ស្តីពីការប្រឆាំងនឹង សន្ធិសញ្ញាព្រំដែនបំពេញបន្ថែម ទៅលើសន្ធិសញ្ញាកំណត់ព្រំដែនរដ្ឋ រវាងកម្ពុជា និងវៀតណាម (មានឯកសារ) កាលពីខែតុលា ឆ្នាំ២០០៥។

សូមទាញយកសេចក្តីថ្លែងការណ៍ ឬអានអត្ថបទខាងក្រោម។

សេចក្តីថ្លែងការណ៍
សូមដោះលែងលោក អៀ ចាន់ណា ដោយគ្មានលក្ខខណ្ឌ

ក្រុមប្រឹក្សាឃ្លាំមើលកម្ពុជា ពិនិត្យឃើញថា សកម្មជនព្រំដែន និងជាសមាជិកក្រុមប្រឹក្សាឃ្លាំមើលកម្ពុជា លោក អៀ ចាន់ណា គ្មានកំហុសដូចការចោទប្រកាន់ ពីសំណាក់សាលាដំបូងរាជធានីភ្នំពេញទេ។ ការចាប់ឃុំខ្លួនលោក អៀ ចាន់ណា ជាការធ្វើឡើងក្រោមហេតុផលនយោបាយ ខណៈពេលលោក ទៅចូលរួមយុទ្ធនាការឃោសនាបោះឆ្នោតឃុំសង្កាត់ ជាមួយគណបក្សភ្លើងទៀន។ ការចាប់ឃុំខ្លួននេះ ជាការរំលោភរដ្ឋធម្មនុញ្ញយ៉ាងធ្ងន់ធ្ងរ។

លោក អៀ ចាន់ណា មានសិទ្ធិពេញលេញចូលរួមសកម្មភាពនយោបាយ សកម្មភាពសង្គម ក្នុងនាមជាពលរដ្ឋខ្មែរ និង ជាសកម្មជននយោបាយ ដូចពលរដ្ឋ និងអ្នកនយោបាយឯទៀតដែរ ដោយស្របតាមខ្លឹមសារនៃរដ្ឋធម្មនុញ្ញ មាត្រា៣៥ «ប្រជាពលរដ្ឋ ខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និង វប្បធម៌របស់ប្រទេសជាតិ»។

ដោយរំលឹកឡើងវិញថា រដ្ឋាភិបាលកម្ពុជា បានធ្វើសច្ចាប្រណិធាន និងប្តេជ្ញាយ៉ាងមុតមាំ គោរពខ្ជាប់ខ្ជួននូវរដ្ឋធម្មនុញ្ញរបស់ខ្លួន គោរពកិច្ចព្រមព្រៀងទីក្រុងប៉ារីសឆ្នាំ១៩៩១ និងគោរពអនុសញ្ញា កតិការសញ្ញា សន្ធិសញ្ញា កិច្ចព្រមព្រៀង របស់អង្គការសហប្រជាជាតិ អ.ស.ប. (UN) និងអង្គការអន្តរជាតិនានា ដែលជាមាគារ៌បស់កម្ពុជា ធានាការអនុវត្តលទ្ធិប្រជាធិបតេយ្យ ការគោរពសិទ្ធិ មនុស្ស និងនីតិរដ្ឋពេញលញ។

ក្រុមប្រឹក្សាឃ្លាំមើលកម្ពុជា សូមអំពាវនាវដល់តុលាការរាជធានីភ្នំពេញ និងរដ្ឋាភិបាលនៃលោក ហ៊ុន សែន ដោះលែងលោក អៀ ចាន់ណា ដោយគ្មានលក្ខខណ្ឌ, ម្លាក់ចោលបទចោទនានាទៅលើសកម្មជននយោបាយ សកម្មជនសង្គម និងទម្លាក់បទចោទលើសំណុំរឿងលោក កឹម សុខា ដើម្បីស្តារស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាឡើងវិញ។

ទីក្រុងគ្រីស្ទានសាន់ (ន័រវែស) ថ្ងៃទី០១ ខែមិថុនា ឆ្នាំ២០២២

ម៉ែន ណាត (ហត្ថលេខា និងត្រា)
ប្រធានក្រុមប្រឹក្សាឃ្លាំមើលកម្ពុជា