ដោយៈវឌ្ឍនៈ
ភ្នំពេញៈ បាត់ដំបងជាខេត្តមួយ ដែលមានសក្ដានុពលខ្ពស់ ដោយមានជាតំបន់រមណីយដ្ឋានទេសចរណ៍ ការអភិវឌ្ឍទៅលើសំណង់ជាច្រើន និងការពុះដីឡូត៏ផងដែរ ដែលជំរុញឱ្យតម្រូវការដីធ្លី ក្នុងតំបន់នេះមានកំណើនជាបន្តបន្ទាប់ និងបានធ្វើឱ្យតម្លៃដីធ្លីក៏ហក់ខ្ពស់ជាងមុន ជាពិសេសនៅក្នុងឆ្នាំ២០២២នេះ។
លោកកែវ សារ៉ន ប្រធានក្រុមហ៊ុន Century 21 Zillion Holding ប្រចាំខេត្តបាត់ដំបង បានមានប្រសាសន៍ឱ្យដឹង តាមទូរស័ព្ទ នារសៀលថ្ងៃទី៣០ មិថុនានេះថា តម្លៃដីធ្លីនៅក្នុងខេត្តបាត់ដំបង ក្នុងឆ្នាំ២០២២នេះបានបន្តងើបឡើងខ្ពស់ ដែលនៅក្នុងនោះ សូម្បីតែដីស្រែក៏មានតម្លៃខ្ពស់ផងដែរ ។
លោកបន្តថា "ដីនៅក្នុងក្រុងបាត់ដំបង ជាមធ្យមមានតម្លៃចន្លោះពី២៥ ទៅ៦០ដុល្លារអាមេរិកក្នុងមួយម៉ែត្រការ៉េ ដោយដីនៅតំបន់ខ្លះដូចជានៅពុំពុយនោះ មានតម្លៃចាប់ពី៣០ដុល្លារអាមេរិកឡើងទៅ"។លោកបន្តថា "ចំណែកអ្នកទិញដីនៅបាត់ដំបង នៅក្នុងក្រុងភាគច្រើនគេទិញ ដើម្បីអភិវឌ្ឍន៍ភ្លាមជាបុរី ជាលំនៅឋានដើម្បីលក់ជូនអតិថិជន ហើយអ្នកដែលទិញដីនិងអភិវឌ្ឍន៍នោះទៀតសោត ក៏ជាអ្នកក្នុងខេត្តបាត់ដំបងផ្ទាល់"។
លោកកែវ សារ៉នបានបន្តទៀតថា ចំណែកអ្នកទិញដីស្រែវិញ គេបានចាក់បំពេញ សម្រាប់អភិវឌ្ឍន៍ជាសំណង់ផង និងខ្លះទៀតយកទៅពុះឡូត៏ ដើម្បីលក់បន្ត ។ ឥឡូវនេះដីនៅបាត់ដំបង រកទិញលែងចង់បានហើយ ពីព្រោះអីមានឧកញ៉ាៗធំៗជាច្រើន បានចុះមកទិញផ្ទាល់ ជាពិសេសនៅតំបន់គម្រោងអភិវឌ្ឍន៍ផ្លូវរបស់រដ្ឋាភិបាល ដែលធ្វើឱ្យតម្រូវការដីកាន់តែមានច្រើន ជាមួយកំនើនក៏កើនឡើងខ្ពស់បន្ថែម។
លោកបន្ថែមថា ក្រៅពីតំបន់នៅក្រុងបាត់ដំបង នៅឯស្រុកបាណន់ដែលជាតំបន់រមណីយដ្ឋានល្បីៗជាច្រើននោះ ក៏មានការមានតម្រូវការដីធ្លីច្រើនដែរ ដោយអ្នកទិញ គេទុកពុះ ឡូត៏និងអភិវឌ្ឍន៍រមណីយដ្ឋានសម្រាប់ទាក់ទាញទេសចរទៅកម្សាន្ត ។
លោករំពឹងថា នៅពេលអនាគតឆាប់ៗនេះ បាត់ដំបងនឹងកាន់តែរីកចម្រើនទៅលើសំណង់ អចលនទ្រព្យ ជាពិសេសអចលនទ្រព្យសម្រាប់បម្រើឱ្យវិស័យទេសចចរណ៍ ខណៈខេត្តនេះក៏ទាក់ទាញទេសចរណ៍បានច្រើនដែរក្នុងមួយឆ្នាំៗ ជាពិសេសនៅរដូវបុណ្យជាតិ និងថ្ងៃឈប់សម្រាកធំៗ ភ្ញៀវទេសចរជាតិនិងអន្តរជាតិជាច្រើន បានមកលេងខេត្តបាត់ដំបង។
រដ្ឋាភិបាលក៏បាន និងកំពុងសាងសង់ផ្លូវមួយខ្សែ តភ្ជាប់ពីខេត្តបាត់ដំបងឆ្លងកាត់ខេត្តពោធិ៍សាត់ ទៅកាន់ខេត្តកោះកុងផងដែរ ដែលផ្លូវមួយខ្សែនេះនឹងបង្ខិតខេត្ត ដែលមានសក្ដានុពលលើវិស័យអចលនទ្រព្យ កាន់តែជិតគ្នា និងជំរុញឱ្យវិស័យដីធ្លី និងអចលនទ្រព្យក្នុងខេត្តទាំងបី នឹងមានកំណើនបន្ថែម។
លោកព្រាប កុលប្រធានក្រុមប្រឹក្សាភិបាលនៃក្រុមហ៊ុន Century 21 Zillion Holding បានឱ្យដឹងថា បណ្ដាខេត្តទូទាំងប្រទេសកម្ពុជា សុទ្ធតែមានសក្ដានុពលទៅលើវិស័យដីធ្លី គ្រាន់តែខេត្តខ្លះមានការកែច្នៃដីនោះឱ្យកាន់តែមានតម្លៃនិងខេត្តខ្លះ មិនទាន់កែច្នៃដីឱ្យមានតម្លៃប៉ុណ្ណឹង តែសម្រាប់សក្ដានុពលសុទ្ធតែមានដូចគ្នាទាំងអស់៕
No comments:
Post a Comment